Тест куни сиз фақат тестни ўйланг — қолган ҳаммаси шу мақолада

Сиз бир йил тайёрландингиз. Минглаб тест ечдингиз. Энди энг охирги, энг осон босқич қолди — тест кунига тўғри келиб олиш.

Бу мақолани бир марта ўқинг, охиридаги рўйхатни бир марта текширинг — ва тест куни эрталаб миянгизда фақат битта нарса қолади: саволлар. Қолган ҳаммасини биз ёзиб қўйдик.

Ёнингизда бўлиши керак бўлган бор-йўғи 2 та нарса

• Паспорт ёки ID-карта — фақат асл нусхаси;


• Абитуриент рухсатномаси — қоғозга чоп этилган ҳолда.

Шу иккаласи бор — сиз ичкаридасиз. Бошқа ҳеч нарса керак эмас: на ручка, на сув, на қоралама қоғоз. Ҳаммаси аудиторияда берилади.

Нега айнан ASL нусха?

Билим ва малакаларни баҳолаш агентлигининг қоидаси аниқ: паспорт нусхаси, сканер нусхаси ёки фотосурати ҳужжат сифатида қабул қилинмайди.

"Телефонимда my.gov.uz'даги электрон паспортим бор-ку?" — яхши савол. 2025-йил 1-июлдан электрон ҳужжатлар расман тан олинади, бу рост. Лекин тест биносига телефоннинг ўзи киритилмайди — демак, ундаги электрон паспорт ҳам сизга ёрдам бера олмайди. Шунчаки асл ҳужжатни олинг, вассалом.

Агар паспортингиз алмаштирилаётган ёки йўқолган бўлса — буни бугун ҳал қилинг, тест кунигача вақт бор.

Рухсатнома: 2 дақиқалик иш, ҳозироқ қилинг

Рухсатномани my.uzbmb.uz сайтидан юклаб оласиз — шахсий идентификация рақамингиз (ЖШШИР) ҳамда паспорт серияси ва рақами кифоя.

Муҳими: уни қоғозга чоп этинг. Телефондаги кўриниши ҳисобга олинмайди (сабаб юқорида — телефон ичкарига кирмайди).

Ва мана энг фойдали сир: тестингизнинг аниқ санаси, вақти ва манзили айнан рухсатномада ёзилган. Уни юклаб олган заҳоти учаласини ҳам ўқиб чиқинг. Баъзида абитуриент ўзи кутган бинода эмас, бошқа ҳудудда тест топшириши белгиланган бўлади — буни тест куни эрталаб эмас, бугун билган яхши.

Қачон бориш керак?

Қоида қаттиқ: кечиккан абитуриент тест синовига киритилмайди. Ҳеч қандай "5 дақиқагина-ку", ҳеч қандай истисно.

Лекин бунга умуман тушиб қолмасликнинг осон йўли бор — эрта боринг:

• Рухсатномадаги вақтдан камида 1,5 соат олдин тест ҳудудида бўлинг;


• Манзил нотаниш бўлса, йўлни олдиндан харитада кўриб қўйинг — иложи бўлса, бир кун аввал бориб кўринг;


• Эрталабки транспорт ва тирбандликни ҳисобга олиб, захира вақт билан чиқинг.

Эрта боришнинг яна бир бонуси бор: шошилмаган одам хотиржам бўлади. Тест олдидан 20 дақиқа тинч ўтириб нафас ростлаш — бу ҳам тайёргарликнинг бир қисми.

Уйда қолдиринг: бу буюмлар билан ичкарига кирилмайди

• уяли телефон ва ҳар қандай электрон қурилма;


• микрокалкулятор;


• луғат, жадвал, китоб;


• шпаргалка (биламиз, сизда йўқ — лекин қоидада бор 😄).

Энг яхши ечим — буларни умуман олиб бормаслик. Телефонни уйда қолдиринг ёки сизни кузатиб борган яқинингизга беринг. Сумкангиз қанча бўш бўлса, киришингиз шунча тез ва тинч ўтади.

Ичкарида сизни нима кутади?

Ҳаммаси тайёр бўлади: жавоблар варақасини тўлдириш учун ручка берилади, қоралама учун бўш қоғоз берилади. Сиз фақат ўзингизни ва билимингизни олиб борасиз.

Натижалар ҳам узоқ куттирмайди: тўплаган балларингиз тест ўтказилган куннинг эртасига эълон қилинади.

Тест кунидан олдинги кеча: 5 дақиқалик текширув

1. Паспорт ёки ID-карта (асли) — сумкага солинди ✅


2. Рухсатнома — чоп этилди, сумкага солинди ✅


3. Рухсатномадаги сана, вақт, манзил — қайта ўқилди ✅


4. Йўлга чиқиш вақти — 1,5 соат захира билан ҳисобланди ✅


5. Телефон, калькулятор, китоблар — сумкадан чиқарилди ✅

Шу 5 та катакча тўлдирилдими — ётинг ва ухланг. Сиз тайёрсиз.

Тез-тез сўраладиган саволлар

Рухсатномани телефонда кўрсацам бўладими?

Йўқ — телефоннинг ўзи ичкарига киритилмайди. Фақат чоп этилган қоғоз.

Паспортим янгиланяпти, нусхаси билан кирсам бўладими?

Йўқ, фақат асл ҳужжат. Тест кунигача тиклаб олишга ҳаракат қилинг.

Ручка олиб борсам-чи, барибир?

Шарт эмас — ичкарида берилади. Ўзингизникини олиб киришга рухсат берилмайди.

Сув-чи?

Аудиторияда берилади. Сумкани бўш қолдиринг.

Охирги кунларда баллни нима оширади?

Янги мавзу эмас — ўз хатоларингиз. Хато — бу миянгиз "биламан" деб сизни алдаган аниқ нуқта. Ҳар бир тузатилган хато — имтиҳонда йўқотмайдиган баллингиз.

TestMakon.uz'да ечган барча тестларингиздаги хато жавоблар сақланиб туради — уларни очиб, қайтадан ечиб чиқинг:

👉 Хато жавобларим устида ишлаш

Манба: Билим ва малакаларни баҳолаш агентлиги расмий маълумотлари.