Ўқишни кўчириш 2026: шартлар, ҳужжатлар ва муҳим муддатлар
Ғолибжон Давронов
Ўқишни бир олий таълим муассасасидан бошқасига кўчириш — бу ҳар йили минглаб талабалар фойдаланадиган имконият. Лекин муддатлар қатъий, шартлар эса аниқ. Қуйида тўлиқ ва тушунарли қўлланмани келтирамиз.
📅 Муҳим муддатлар
- Ўқишни кўчириш бўйича аризалар ҳар йили 15-июлдан 5-августгача қабул қилинади.
- Берилган аризалар 5-августдан 30-августгача кўриб чиқилади.
🖥 Ариза қаерда топширилади?
Ариза қуйидаги расмий платформалар орқали онлайн топширилади:
- transfer.edu.uz — давлат олийгоҳининг биридан бошқасига, шунингдек хусусий олийгоҳлар ўртасида кўчириш учун.
- my.uzbmb.uz — хорижий ҳамда нодавлат олий таълим муассасаларидан давлат олийгоҳларига, ва хорижий олийгоҳлардан нодавлат олийгоҳларга кўчириш учун.
👥 Кимлар ўқишини кўчира олади?
Ўзбекистондаги бир ОТМдан бошқасига кўчириш учун фақат 2 тоифа талабаларга рухсат берилади:
- Талаба турмушга чиқса — турмуш ўртоғининг яшаш жойидаги ОТМга кўчиши мумкин.
- Давлат хизматчисининг иш жойи ўзгарганда — унинг фарзанди ёки турмуш ўртоғи тегишли раҳбар тавсияномаси билан ўқишини кўчириши мумкин.
📄 Керакли ҳужжатлар
- Кўчирилиши сўралаётган таълим йўналиши, ўқув тили ва шакли кўрсатилган ариза;
- Рейтинг дафтарчаси ёки академик маълумотнома нусхалари;
- Ички кўчириш бўлса — асослантирувчи ҳужжат;
- Паспорт ёки ID карта нусхаси.
⛔️ Қайси ҳолларда ариза рад этилади?
Қуйидаги ҳолатларда ўқишни кўчириш аризаси рад этилиши мумкин:
- Аккредитацияга эга бўлмаган хорижий ОТМ ёки уларнинг филиалларида ўқиганлар;
- Мавжуд таълим шаклидан бошқа таълим шаклида ўқиганлар;
- ОТМнинг марказлари, бўлимлари ёки ўқув-маслаҳат пунктларида ўқиганлар;
- 1-курс 1-семестрни тугатмасдан кўчмоқчи бўлганлар;
- Мос таълим йўналиши ёки шакли бўлмаганида, фанлар бўйича фарқлар 4 тадан ошганда;
- Контракт асосида ўқиётганлар тўловни ўз муддатида тўламаганда;
- Талабанинг шахсий йиғма жилди ўз муддатида тақдим этилмаганда;
- Грант билан кўчириш учун бўш ўрин бўлмаганда;
- ОТМнинг моддий-техника базаси имконияти чекланганда;
- Мақсадли қабул қилинганлар бошқа йўналиш ёки ОТМга кўчмоқчи бўлганда;
- Кечки таълимдан сиртқига, ёки кечки таълимнинг бир соҳасидан бошқасига ўтмоқчи бўлганда;
- Қўшма таълим дастурлари асосида таҳсил олаётган талабалар.
🎓 Грант асосида кўчириш
- Грант асосида кўчириш учун фақат грантда ўқиётган талабалар ариза бериши мумкин. Бунда ариза берилган ОТМнинг жорий йилдаги қабул квотасида грант ўринлари мавжуд бўлиши шарт.
- Кўзи ожиз ҳамда ногиронлиги бўлган шахсларга ажратилган квотада грант асосида ўқиётганлар ўқиши гранти асосида кўчирилади.
- Хорижий ОТМдан Ўзбекистон ОТМларига кўчмоқчи бўлганлар махсус синов (тест, ёзма иш ёки касбий-ижодий имтиҳон) топширади.
💡 Хулоса
Ўқишни кўчириш — бу тўғри йўналишни танлаш имконияти. Агар сиз ҳали қайси университет ёки йўналиш сизга мос келишига ишончингиз комил бўлмаса, TestMakon орқали ўз билим даражангизни текширинг ва реал баллар асосида қаерга киришингиз мумкинлигини билиб олинг.
Янги: техникум ва коллежда ўқишни кўчириш, қайта тиклаш ҳамда 10-синфдан техникумга ўтиш тартиби 2026-йил августда ўзгарди — янги тартиб ва муддатлар.
